ភ្នំពេញ៖ កីឡាករកម្ពុជា លោក Woo Dong Hoon ដែលស្គាល់ថាជាគ្រូបង្វឹករបស់កីឡាការិនី ស្រួង ភាវី បានយកឈ្នះស្តេចស្នូកឃ័ហ្វីលីពីន លោក Efren Reyes លើវិញ្ញាសាការ៉ុម៣បាំងក្នុងលទ្ធផល ៤០ទល់នឹង១៥ ដែលប្រកួតនៅផ្សារទំនើបអ៊ីអនសែនសុខកាលពីថ្ងៃទី០៩ ខែឧសភា ឆ្នាំ២០២៣។

កីឡាករកម្ពុជា លោក Woo Dong Hoon នឹងឡើងទៅប្រកួតនៅពាក់កណ្តាលវគ្គផ្តាច់ព្រ័ត្រនៅវេលាល្ងាចម៉ោង៦ ថ្ងៃទី១០ ខែឧសភា ឆ្នាំ២០២៣ ជួបជាមួយគូប្រកួតកីឡាករថៃ លោក Suriya Suwannasingh នៅផ្សារទំនើបអ៊ីនសែនសុខ។

លោក Woo Dong Hoonដែលតំណាងកីឡាករកម្ពុជាបានយកឈ្នះស្តេចស្នូកឃ័រហ្វីលីពីន បន្ទាប់ពីកូនក្រុម កីឡាការិនី ស្រួង ភាវី ដណ្តើមបានមេដាយមាសលើប្រភេទកីឡាប៊ីយ៉ា-ស្នូកឃ័រ នៃវិញ្ញាសាកីឡាប៊ីយ៉ា ការ៉ុម (៣បាំង) ក្រោយយកឈ្នះគូប្រកួតកីឡាការិនីវៀតណាម Hong Yen Nhi Nguyenក្នុងលទ្ធផល ២៥-២០ កាលពីល្ងាចថ្ងៃទី០៨ ខែឧសភា ឆ្នាំ២០២៣។

គូសបញ្ជាក់ថា គិតត្រឹមម៉ោង១២ថ្ងៃនេះ ថៃឈរលំដាប់ថ្នាក់លេខ១ ដែលទទួលបានមេដាយមាសច្រើនជាងគេ រហូតដល់៤១មេដាយមាស។ បន្ទាប់មកគឺប្រទេសវៀតណាមដែលទទួលបានមេដាយមាសចំនួន៤០ ចំណែកកម្ពុជាឈរលំដាប់ថ្នាក់ទី៣ ដែលទទួលបានមេដាយមាសចំនួន៣៩មេដាយមាស៕